𐍂𐌰𐌿𐌳𐌰𐌷𐍉𐌳𐌹𐌻𐍉

𐍆𐌰𐌿𐍂 𐌼𐌰𐌽𐌰𐌲𐌰𐌽𐍃 𐌰𐌸𐌽𐌰𐌽𐍃 𐌹𐌽 𐍅𐌴𐌹𐌷𐍃𐌰 𐍃𐌿𐌼𐌰𐌼𐌼𐌰 𐌼𐌰𐍅𐌹𐌻𐍉 𐌻𐌹𐌱𐌰𐌹𐌳𐌰 𐍃𐌺𐌰𐌿𐌽𐍃, 𐍆𐍂𐌹𐌾𐍉𐌳𐌰 𐍆𐌹𐌻𐌿 𐍆𐍂𐌰𐌼 𐌰𐌹𐌸𐌴𐌹𐌽 𐌾𐌰𐌷 𐌽𐌰𐌿𐌷 𐌼𐌰𐌹𐍃 𐌰𐍅𐍉𐌽 𐍃𐌴𐌹𐌽𐌰𐌹. 𐌱𐌴𐍂𐌿𐍃𐌹 𐌾𐌰𐌹𐌽𐌰 𐌷𐍉𐌸 𐍂𐌰𐌿𐌳𐌰𐌽𐌰 𐌳𐌰𐌿𐌷𐍄𐍂 𐌲𐌰𐍃𐌺𐌰𐍀𐌹𐌳𐌰. 𐌾𐌰𐌷 𐌲𐌰𐌻𐌴𐌹𐌺𐌰𐌹𐌳𐌰 𐌸𐌹𐌶𐌰𐌹 𐌼𐌰𐍅𐌹𐌻𐍉𐌽 𐍆𐌹𐌻𐌿, 𐍃𐍅𐌰𐍃𐍅𐌴 𐍃𐌹𐌽𐍄𐌴𐌹𐌽𐍉 𐍃𐌹𐌺 𐌸𐌴 𐍅𐌰𐍃𐌹𐌳𐌰· 𐌷𐌰𐌹𐍄𐌰𐌽𐌿𐌷 𐌸𐌰𐌽 𐍅𐌰𐍃 𐍂𐌰𐌿𐌳𐌰𐌷𐍉𐌳𐌹𐌻𐍉.

𐌰𐌹𐌽𐌰𐌼𐌼𐌿𐌷 𐌸𐌰𐌽 𐌳𐌰𐌲𐌰, 𐌰𐌹𐌸𐌴𐌹 𐌹𐌶𐍉𐍃 𐌵𐌰𐌸 𐌹𐌶𐌰𐌹᛬ «𐌽𐌹𐌼 𐌷𐌻𐌰𐌹𐌱𐌹𐍃, 𐌻𐌹𐌿𐌱𐍉 𐌼𐌴𐌹𐌽𐌰, 𐌾𐌰𐌷 𐌸𐌰𐍄𐌰 𐍅𐌴𐌹𐌽, 𐌾𐌰𐌷 𐌸𐌰𐌹𐍂𐌷 𐍄𐍂𐌹𐌿 𐌲𐌰𐌲𐌲𐌰𐌽𐌳𐍃 𐌲𐌰𐌱𐌰𐌹𐍂 𐌸𐍉 𐌰𐍅𐍉𐌽. 𐌷𐌰𐌿𐍃𐌹𐌳𐌰 𐌰𐌿𐌺 𐌸𐌰𐍄𐌴𐌹 𐍃𐍉 𐍃𐌹𐌿𐌺𐌰 𐍅𐌰𐍂𐌸. 𐌹𐌸 𐌰𐍄𐍃𐌰𐌹𐍈𐌰𐌹𐍃 𐌸𐌿𐍃, 𐌿𐌽𐍄𐌴 𐌹𐌽 𐌸𐌰𐌼𐌼𐌰 𐍅𐌹𐌳𐌰𐌿 𐍅𐌿𐌻𐍆𐍃 𐌱𐌰𐌿𐌹𐌸. 𐌽𐌹 𐍂𐍉𐌳𐌾𐌰𐌹𐍃 𐌼𐌹𐌸 𐍆𐍂𐌰𐌼𐌰𐌸𐌾𐌰𐌹𐌼.»

𐍃𐌿𐌽𐍃 𐌽𐌿 𐌲𐌰𐌻𐌰𐌹𐌸 𐍂𐌰𐌿𐌳𐌰𐌷𐍉𐌳𐌹𐌻𐍉 𐌳𐌿 𐌲𐌰𐍂𐌳𐌰 𐌰𐍅𐍉𐌽𐍃, 𐍃𐌰𐌴𐌹 𐌰𐍄 𐌰𐌽𐌸𐌰𐍂𐌰𐌹 𐍆𐌴𐍂𐌰𐌹 𐍄𐍂𐌹𐍅𐌹𐍃 𐍅𐌰𐍃 𐌻𐌰𐌲𐌹𐌸𐍃.

𐍈𐌰𐌹𐍂𐌱𐌰𐌽𐌳𐌴𐌹𐌽 𐌰𐌽𐌳 𐍀𐌰𐌸𐌰 𐌹𐌽 𐌼𐌹𐌳𐌿𐌼𐌰𐌹 𐌱𐌰𐌲𐌼𐌴, 𐌲𐌰𐌼𐍉𐍄𐌹𐌳𐌰 𐌸𐌹𐌶𐌰𐌹 𐍅𐌿𐌻𐍆𐍃, 𐌵𐌹𐌸𐌰𐌽𐌳𐍃᛬ «𐌺𐌽𐌰𐍅𐌰𐌽𐌰 𐌳𐌰𐌲, 𐍂𐌰𐌿𐌳𐌰𐌷𐍉𐌳𐌹𐌻𐍉. 𐍈𐌰𐌳𐍂𐌴 𐌲𐌰𐌲𐌲𐌹𐍃;». 𐌰𐌽𐌳𐍅𐌰𐌿𐍂𐌳𐌹𐌳𐌰 𐌽𐌿 𐌹𐌼𐌼𐌰᛬ «𐌺𐌽𐌰𐍅𐌰𐌽𐌰 𐌳𐌰𐌲. 𐌳𐌿 𐌰𐍅𐍉𐌽 𐍃𐌹𐌿𐌺𐌰𐌹 𐌼𐌴𐌹𐌽𐌰𐌹.». 𐍃𐌰 𐍅𐌿𐌻𐍆𐍃 𐌱𐌹𐌸𐌰𐌲𐌺𐌾𐌰𐌽𐌳𐍃 𐌸𐌰𐍄𐌴𐌹 𐍃𐌰𐌸𐍃 𐍅𐌰𐌹𐍂𐌸𐌰𐌹 𐌹𐍄𐌰𐌽𐌳𐍃 𐌱𐌰𐌹 - 𐌾𐌰𐌷 𐌰𐍅𐍉𐌽 𐌾𐌰𐌷 𐌽𐌹𐍆𐍄- 𐌸𐌰𐌽𐌰𐌼𐌰𐌹𐍃 𐌰𐌽𐌳𐌷𐍂𐌿𐍃𐌺𐌰𐌽𐌳𐍃 𐍆𐍂𐌰𐌷᛬ «𐍈𐌰𐍂 𐌱𐌰𐌿𐌹𐌸 𐍃𐍉 𐌰𐍅𐍉 𐌸𐌴𐌹𐌽𐌰;». 𐌾𐌰𐌷 𐍂𐌰𐌿𐌳𐌰𐌷𐍉𐌳𐌹𐌻𐍉 𐌰𐌽𐌳𐌷𐍉𐍆᛬ «𐌹𐌽 𐍂𐌰𐌶𐌽𐌰 𐌻𐌴𐌹𐍄𐌹𐌻𐌰𐌼𐌼𐌰 𐌷𐌹𐌽𐌳𐌰𐍂 𐌸𐌰𐌼𐌼𐌰 𐍄𐍂𐌹𐍅𐌰.». 𐍃𐌰 𐍅𐌿𐌻𐍆𐍃 𐌸𐌰𐌽 𐌵𐌰𐌸᛬ «𐌳𐌿 𐍈𐌴 𐍃𐌽𐌹𐌿𐌼𐌴𐌹𐍃, 𐌱𐌹 𐌸𐌴 𐍃𐍅𐌰 𐍃𐌺𐌰𐌿𐌽𐍃 𐌹𐍃𐍄 𐍃𐍄𐌰𐌸𐍃 𐍃𐌰;». 𐌿𐍃𐌷𐌰𐍆𐌾𐌰𐌽𐌳𐌴𐌹 𐌽𐌿 𐌰𐌿𐌲𐍉𐌽𐌰 𐍂𐌰𐌿𐌳𐌰𐌷𐍉𐌳𐌹𐌻𐍉 𐌱𐌹𐍃𐌰𐍈 𐌱𐌻𐍉𐌼𐌰𐌽𐍃 𐍆𐌹𐌻𐌿𐍆𐌰𐌹𐌷𐌰𐌽𐍃 𐌱𐌹𐍃𐌿𐌽𐌾𐌰𐌽𐌴 𐍃𐌴𐌹𐌽𐌰 𐌾𐌰𐌷 𐌻𐌹𐌿𐌷𐌰𐌸 𐍄𐌰𐌷𐌾𐌰𐌽𐌳𐍉 𐌸𐌰𐌹𐍂𐌷 𐌱𐌰𐌲𐌼𐌰𐌽𐍃, 𐌰𐌽𐌰𐍃𐍄𐍉𐌳𐌹𐌳𐌿𐌷 𐌻𐌹𐍃𐌰𐌽 𐌾𐌰𐌹𐌽𐌰𐌽𐍃 𐌱𐌻𐍉𐌼𐌰𐌽𐍃. 𐌹𐌸 𐍃𐌰 𐍅𐌿𐌻𐍆𐍃 𐌸𐍂𐌰𐌲𐌹𐌳𐌰 𐍂𐌰𐌹𐌷𐍄𐌰𐌱𐌰 𐌳𐌿 𐌲𐌰𐍂𐌳𐌰 𐌰𐍅𐍉𐌽𐍃.

𐌸𐌰𐌽 𐍃𐌰 𐍅𐌿𐌻𐍆𐍃 𐌵𐌰𐌼 𐌰𐍄 𐍂𐌰𐌶𐌽𐌰, 𐌺𐌽𐌿𐌺𐍉𐌳𐌰 𐌳𐌰𐌿𐍂𐍉𐌼. «𐍈𐌰𐍃 𐌹𐍃𐍄;» 𐍆𐍂𐌰𐌷 𐌰𐍅𐍉. «𐌹𐌺 𐌹𐌼, 𐍂𐌰𐌿𐌳𐌰𐌷𐍉𐌳𐌹𐌻𐍉» 𐌰𐌽𐌳𐌷𐍉𐍆 𐍅𐌿𐌻𐍆𐍃. «𐍃𐌺𐌹𐌿𐍆 𐌷𐌰𐍃𐍀𐌾𐍉𐌽 𐌾𐌰𐌷 𐌳𐌰𐌿𐍂𐍉𐌽𐍃 𐌿𐍃𐌻𐌿𐌺𐌽𐌰𐌽𐌳.» 𐌵𐌰𐌸 𐌰𐍅𐍉, «𐌿𐍆𐌰𐍂 𐍃𐌹𐌿𐌺𐌰 𐌹𐌼 𐌳𐌿 𐌿𐍂𐍂𐌹𐍃𐌰𐌽.». 𐌹𐌽𐌽 𐌸𐌰𐌽 𐌹𐌳𐌳𐌾𐌰 𐍅𐌿𐌻𐍆𐍃, 𐍆𐍂𐌴𐍄𐌿𐌷 𐌸𐍉 𐌰𐍅𐍉𐌽. 𐌸𐌰𐍂𐌿𐌷 𐌲𐌰𐍅𐌰𐍃𐌹𐌳𐌰 𐍃𐌹𐌺 𐌹𐌶𐍉𐍃 𐍅𐌰𐍃𐍄𐌾𐌰𐌹, 𐌰𐌽𐌰𐍄𐌰𐌿𐌷 𐌽𐌰𐌷𐍄𐌰𐌷𐌿𐌱𐍉𐌽 𐌾𐌰𐌷 𐌲𐌰𐌻𐌰𐌲 𐌹𐌽 𐌱𐌰𐌳𐌹.

𐌳𐌿𐌰𐍄𐌲𐌰𐌲𐌲𐌰𐌽𐌳𐌴𐌹 𐌲𐌰𐍂𐌳𐌰 𐌰𐍅𐍉𐌽𐍃 𐍃𐌴𐌹𐌽𐌰𐌹𐌶𐍉𐍃 𐍂𐌰𐌿𐌳𐌰𐌷𐍉𐌳𐌹𐌻𐍉 𐌺𐌽𐌿𐌺𐍉𐌳𐌰 𐌳𐌰𐌿𐍂𐍉𐌼. «𐍈𐌰𐍃 𐌹𐍃𐍄;» 𐍆𐍂𐌰𐌷 𐍅𐌿𐌻𐍆𐍃 𐌷𐌽𐌰𐍃𐌵𐌾𐌰𐌽𐌳𐍃 𐍃𐍄𐌹𐌱𐌽𐌰. «𐌹𐌺 𐌹𐌼, 𐍂𐌰𐌿𐌳𐌰𐌷𐍉𐌳𐌹𐌻𐍉» 𐌰𐌽𐌳𐌷𐍉𐍆 𐍃𐍉 𐌼𐌰𐍅𐌹𐌻𐍉. «𐍃𐌺𐌹𐌿𐍆 𐌷𐌰𐍃𐍀𐌾𐍉𐌽 𐌾𐌰𐌷 𐌳𐌰𐌿𐍂𐍉𐌽𐍃 𐌿𐍃𐌻𐌿𐌺𐌽𐌰𐌽𐌳.» 𐌵𐌰𐌸 𐍅𐌿𐌻𐍆𐍃, «𐌿𐍆𐌰𐍂 𐍃𐌹𐌿𐌺𐌰 𐌹𐌼 𐌳𐌿 𐌿𐍂𐍂𐌹𐍃𐌰𐌽.» 𐌹𐌽𐌽 𐌸𐌰𐌽 𐌹𐌳𐌳𐌾𐌰 𐍂𐌰𐌿𐌳𐌰𐌷𐍉𐌳𐌹𐌻𐍉 𐌵𐌹𐌸𐌰𐌽𐌴𐌹 «𐌺𐌽𐌰𐍅𐌰𐌽𐌰 𐌳𐌰𐌲, 𐌰𐍅𐍉. 𐍈𐌰𐌹𐍅𐌰 𐌼𐌰𐌲𐍄; 𐌷𐌻𐌰𐌹𐌱𐌹𐍃 𐌾𐌰𐌷 𐍅𐌴𐌹𐌽𐌹𐍃 𐍆𐍂𐌰𐌼 𐌰𐌼𐌼𐍉𐌽 𐌸𐌿𐍃 𐌰𐍄𐌱𐌰𐍂.». «𐌰𐍄𐌻𐌰𐌲𐌴𐌹 𐌸𐍉 𐌰𐌽𐌰 𐌼𐌴𐍃, 𐌻𐌹𐌿𐌱𐍉 𐌼𐌴𐌹𐌽𐌰.» 𐌰𐌽𐌳𐍅𐌰𐌿𐍂𐌳𐌹𐌳𐌰 𐍅𐌿𐌻𐍆𐍃, «𐌰𐌽𐌳𐍅𐌰𐍃𐌴𐌹 𐌸𐌿𐌺 𐌾𐌰𐌷 𐌲𐌰𐌻𐌹𐌲 𐌰𐍄 𐌼𐌹𐍃. 𐌹𐌽 𐍆𐌰𐍂𐍉𐍃 𐌰𐍆𐌼𐍉𐌾𐌰𐌹𐍃.». 𐍃𐍉 𐌿𐍆𐌷𐍉𐍃𐌴𐌹𐌲𐍉 𐌼𐌰𐍅𐌹𐌻𐍉 𐌰𐌽𐌳𐍅𐌰𐍃𐌹𐌳𐌰 𐍃𐌺𐍉𐌷𐌰𐌽𐍃, 𐌷𐌿𐍃𐍉𐌽𐍃 𐌾𐌰𐌷 𐌺𐌻𐌰𐌹𐌸𐌰, 𐍆𐍂𐌰𐌷𐌿𐌷᛬ «𐍈𐌰𐍂 𐌸𐍉 𐌰𐍄𐌻𐌰𐌲𐌾𐌰𐌽;», 𐌳𐌿 𐌸𐌰𐌼𐌼𐌴𐌹 𐍅𐌿𐌻𐍆𐍃 𐌰𐌽𐌳𐍅𐌰𐌿𐍂𐌳𐌹𐌳𐌰᛬ «𐌹𐌽 𐍆𐍉𐌽. 𐌽𐌹 𐌸𐌰𐍂𐍆𐍄 𐌸𐍉 𐌸𐌰𐌽𐌰𐌼𐌰𐌹𐍃. 𐌽𐌹𐌷 𐌸𐌰𐌽𐌰 𐌷𐍉𐌸.». 𐍂𐌰𐌿𐌳𐌰𐌷𐍉𐌳𐌹𐌻𐍉 𐌼𐌹𐌸 𐌲𐌰𐌿𐍂𐌹𐌸𐌰𐌹 𐌿𐍆𐌷𐌰𐌿𐍃𐌹𐌳𐌰 𐍅𐌿𐌻𐍆𐌰 𐌾𐌰𐌷 𐌱𐌹𐌸𐌴 𐌲𐌰𐌻𐌰𐌲 𐌹𐌽 𐌱𐌰𐌳𐌹.

𐍃𐍉 𐌼𐌰𐍅𐌹𐌻𐍉 𐌲𐌰𐍃𐌰𐍈 𐍅𐌿𐌻𐍆𐌰 𐌾𐌰𐌷 𐌱𐌹𐌸𐌰𐌲𐌺𐌹𐌳𐌰᛬
— 𐌰𐍅𐍉, 𐍈𐌰𐌽 𐌼𐌹𐌺𐌹𐌻𐌰𐌹 𐌰𐍂𐌼𐌴𐌹𐍃 𐌸𐌴𐌹𐌽𐌰𐌹!
— 𐌳𐌿 𐌱𐌰𐍄𐌹𐍃 𐌸𐌿𐌺 𐌱𐌹𐍀𐍂𐌰𐌲𐌲𐌰𐌽!
— 𐌰𐍅𐍉, 𐍈𐌰𐌽 𐌼𐌹𐌺𐌹𐌻𐌰 𐌰𐌿𐍃𐍉𐌽𐌰 𐌸𐌴𐌹𐌽𐌰!
— 𐌳𐌿 𐌱𐌰𐍄𐌹𐍃 𐌸𐌿𐌺 𐌷𐌰𐌿𐍃𐌾𐌰𐌽!
— 𐌰𐍅𐍉, 𐍈𐌰𐌽 𐌼𐌹𐌺𐌹𐌻𐌰 𐌰𐌿𐌲𐍉𐌽𐌰 𐌸𐌴𐌹𐌽𐌰!
— 𐌳𐌿 𐌱𐌰𐍄𐌹𐍃 𐌸𐌿𐌺 𐍃𐌰𐌹𐍈𐌰𐌽!
— 𐌰𐍅𐍉, 𐍈𐌰𐌽 𐌼𐌹𐌺𐌹𐌻𐍃 𐌼𐌿𐌽𐌸𐍃 𐌸𐌴𐌹𐌽𐍃!
— 𐌳𐌿 𐌱𐌰𐍄𐌹𐍃 𐌸𐌿𐌺 𐌹𐍄𐌰𐌽!
𐌾𐌰𐌷 𐍆𐍂𐌴𐍄 𐍃𐌰 𐍅𐌿𐌻𐍆𐍃 𐍂𐌰𐌿𐌳𐌰𐌷𐍉𐌳𐌹𐌻𐍉𐌽.