𐌷𐌰𐌿𐌱𐌹𐌳𐌹𐍃𐌺𐍉 𐍆𐌴𐍂𐌰

< 𐌰𐍆𐍄𐍂𐌰 𐌳𐌿 𐍅𐌴𐌹𐌷𐍉𐌽 𐌲𐌰𐌼𐌴𐌻𐌴𐌹𐌽𐌰𐌹

< 𐌼𐌸 ·𐌳·𐌰𐌹𐍅𐌰𐌲𐌲𐌴𐌻𐌾𐍉 𐌸𐌰𐌹𐍂𐌷 𐌹𐍉𐌷𐌰𐌽𐌽𐌴𐌽 >

𐌱𐍉𐌺𐍉𐍃 𐌽𐌰𐌹𐌷𐌰𐌹𐌼𐌴𐌹𐌹𐌽𐍃

𐌰𐍆𐌳𐌰𐌹𐌻 ·𐌴·

[𐌳] 13 . . . . 𐌾𐌰𐌷 𐌵𐌰𐌸 𐌰𐌻𐌻𐌰 𐌲𐌰𐌼𐌰𐌹𐌽𐌸𐍃᛬ 𐌰𐌼𐌴𐌽. 𐌾𐌰𐌷 𐌷𐌰𐌶𐌹𐌳𐌴𐌳𐌿𐌽 𐍆𐍂𐌰𐌿𐌾𐌰𐌽 𐌾𐌰𐌷 𐌲𐌰𐍄𐌰𐍅𐌹𐌳𐌴𐌳𐌿𐌽 𐌸𐌰𐍄𐌰 𐍅𐌰𐌿𐍂𐌳 𐌰𐌻𐌻𐌰 𐍃𐍉 𐌼𐌰𐌽𐌰𐌲𐌴𐌹. 14 𐌾𐌰𐌷 𐍆𐍂𐌰𐌼 𐌸𐌰𐌼𐌼𐌰 𐌳𐌰𐌲𐌰 𐌴𐌹 𐌰𐌽𐌰𐌱𐌰𐌿𐌸 𐌼𐌹𐍃 𐌴𐌹 𐍅𐌴𐌹𐍃𐌾𐌰𐌿 𐍆𐌰𐌿𐍂𐌰𐌼𐌰𐌸𐌻𐌴𐌹𐍃 𐌹𐌶𐌴 𐌹𐌽 𐌹𐌿𐌳𐌰𐌹𐌰, 𐍆𐍂𐌰𐌼 𐌾𐌴𐍂𐌰 ·𐌺· 𐌿𐌽𐌳 𐌾𐌴𐍂 ·𐌻· 𐌾𐌰𐌷 𐌰𐌽𐌸𐌰𐍂 𐌰𐍂𐍄𐌰[𐍂]𐌺𐍃𐌰𐌹𐍂𐌺𐍃𐌰𐌿𐍃 𐌸𐌹𐌿𐌳𐌰𐌽𐌹𐍃 ·𐌹𐌱· 𐌾𐌴𐍂𐌰, 𐌹𐌺 𐌾𐌰𐌷 𐌱𐍂𐍉𐌸𐍂𐌾𐌿𐍃 𐌼𐌴𐌹𐌽𐌰𐌹 𐌷𐌻𐌰𐌹𐍆 𐍆𐌰𐌿𐍂𐌰𐌼𐌰𐌸𐌻𐌴𐌹𐍃 𐌼𐌴𐌹𐌽𐌹𐍃 𐌽𐌹 𐌼𐌰𐍄𐌹𐌳𐌴𐌳𐌿𐌼. 15 𐌹𐌸 𐍆𐌰𐌿𐍂𐌰𐌼𐌰𐌸𐌻𐌾𐍉𐍃 𐌸𐌰𐌹𐌴𐌹 𐍅𐌴𐌹𐍃𐌿𐌽 𐍆𐌰𐌿𐍂𐌰 𐌼𐌹𐍃 𐌺𐌰𐌿𐍂𐌹𐌳𐌴𐌳𐌿𐌽 𐌸𐍉 𐌼𐌰𐌽𐌰𐌲𐌴𐌹𐌽 𐌾𐌰𐌷 𐌽𐌴𐌼𐌿𐌽 𐌰𐍄 𐌹𐌼 𐌷𐌻𐌰𐌹𐌱𐌰𐌽𐍃 𐌾𐌰𐌷 𐍅𐌴𐌹𐌽 𐌾𐌰𐌷 𐌽𐌰𐌿𐌷𐌸𐌰𐌽𐌿𐌷 𐍃𐌹𐌻𐌿𐌱𐍂𐌹𐍃 𐍃𐌹𐌺𐌻𐌴 ·𐌼·, 𐌾𐌰𐌷 𐍃𐌺𐌰𐌻𐌺𐍉𐍃 𐌹𐌶𐌴 𐍆𐍂𐌰𐌿𐌾𐌹𐌽𐍉𐌳𐌴𐌳𐌿𐌽 𐌸𐌹𐌶𐌰𐌹 𐌼𐌰𐌽𐌰𐌲𐌴𐌹𐌽· 𐌹𐌸 𐌹𐌺 𐌽𐌹 𐍄𐌰𐍅𐌹𐌳𐌰 𐍃𐍅𐌰 𐍆𐌰𐌿𐍂𐌰 𐌰𐌽𐌳𐍅𐌰𐌹𐍂𐌸𐌾𐌰 𐌰𐌲𐌹𐍃𐌹𐍃 𐌲𐌿𐌳𐌹𐍃. 16 𐌾𐌰𐌷 𐍅𐌰𐌿𐍂𐍃𐍄𐍅 𐌸𐌹𐌶𐍉𐍃 𐌱𐌰𐌿𐍂𐌲𐍃𐍅𐌰𐌳𐌳𐌾𐌰𐌿𐍃 𐌹𐌽𐍃𐍅𐌹𐌽𐌸𐌹𐌳𐌰, 𐌾𐌰𐌷 𐌸𐌰𐌿𐍂𐍀 𐌽𐌹 𐌲𐌰𐍃𐍄𐌰𐌹𐍃𐍄𐌰𐌻𐌳, 𐌾𐌰𐌷 𐌸𐌹𐍅𐍉𐍃 𐌼𐌴𐌹𐌽𐌰𐌹 𐌾𐌰𐌷 𐌰𐌻𐌻𐌰𐌹 𐌸𐌰𐌹 𐌲𐌰𐌻𐌹𐍃𐌰𐌽𐌰𐌽𐍃 𐌳𐌿 𐌸𐌰𐌼𐌼𐌰 𐍅𐌰𐌿𐍂𐍃𐍄𐍅𐌰. 17 𐌾𐌰𐌷 𐌹𐌿𐌳𐌰𐌹𐌴𐌹𐍃 𐌾𐌰𐌷 𐌸𐌰𐌹 𐍆𐌰𐌿𐍂𐌰𐌼𐌰𐌸𐌻𐌾𐍉𐍃 ·𐍂· 𐌾𐌰𐌷 ·𐌽· 𐌲𐌿𐌼𐌰𐌽𐌴 𐌾𐌰𐌷 𐌸𐌰𐌹 𐌵𐌹𐌼𐌰𐌽𐌳𐌰𐌽𐍃 𐌰𐍄 𐌿𐌽𐍃𐌹𐍃 𐌿𐍃 𐌸𐌹𐌿𐌳𐍉𐌼 𐌸𐌰𐌹𐌼 𐌱𐌹𐍃𐌿𐌽𐌾𐌰𐌽𐌴 𐌿𐌽𐍃𐌹𐍃 𐌰𐌽𐌰 𐌱𐌹𐌿𐌳𐌰 𐌼𐌴𐌹𐌽𐌰𐌼𐌼𐌰 𐌰𐌽𐌳𐌽𐌿𐌼𐌰𐌽𐌰𐌹 𐍅𐌴𐌹𐍃𐌿𐌽. 18 𐌾𐌰𐌷 𐍅𐌰𐍃 𐍆𐍂𐌰𐌵𐌿𐌼𐌰𐌽 𐌳𐌰𐌲𐌹𐍃 𐍈𐌹𐌶𐌿𐌷 𐍃𐍄𐌹𐌿𐍂 ·𐌰· 𐌻𐌰𐌼𐌱𐌰 𐌲𐌰𐍅𐌰𐌻𐌹𐌳𐌰 ·𐌵· 𐌾𐌰𐌷 𐌲𐌰𐌹𐍄𐍃 [·𐌰·] 𐌲𐌰𐌼𐌰𐌽𐍅𐌹𐌳𐌰 𐍅𐌰𐍃 𐌼𐌹𐍃· 𐌾𐌰𐌷 𐌱𐌹 ·𐌹· 𐌳𐌰𐌲𐌰𐌽𐍃 𐌲𐌰𐍆 𐍅𐌴𐌹𐌽 𐌰𐌻𐌻𐌰𐌹 𐌸𐌹𐌶𐌰𐌹 𐍆𐌹𐌻𐌿𐍃𐌽𐌰𐌹 𐌾𐌰𐌷 𐌰𐌻𐌻𐌰𐌹 𐌸𐌹𐌶𐌰𐌹 𐌼𐌰𐌽𐌰𐌲𐌴𐌹𐌽· 𐌾𐌰𐌷 𐌰𐌽𐌰 𐌸𐍉 𐌰𐌻𐌻𐌰 𐌷𐌻𐌰𐌹𐍆 𐍆𐌰𐌿𐍂𐌰𐌼𐌰𐌸𐌻𐌴𐌹𐍃 𐌼𐌴𐌹𐌽𐌹𐍃 𐌽𐌹 𐍃𐍉𐌺𐌹𐌳𐌰, 𐌹𐌽 𐌸𐌹𐍃 𐌴𐌹 𐌽𐌹 𐌺𐌰𐌿𐍂𐌹𐌳𐌴𐌳𐌾𐌰𐌿 𐌸𐍉 𐌼𐌰𐌽𐌰𐌲𐌴𐌹𐌽 𐌹𐌽 𐌸𐌰𐌹𐌼 𐍅𐌰𐌿𐍂𐍃𐍄𐍅𐌰𐌼 . . . .

𐌰𐍆𐌳𐌰𐌹𐌻 ·𐌵·

[𐌳] 14 . . . . 𐍀𐍂𐌰𐌿𐍆𐌴𐍄𐌴, 𐌸𐌰𐌹𐌴𐌹 𐌸𐍂𐌰𐍆𐍃𐍄𐌹𐌳𐌴𐌳𐌿𐌽 𐌼𐌹𐌺. 15 𐌾𐌰𐌷 𐌿𐍃𐍄𐌰𐌿𐌷𐌰𐌽𐌰 𐍅𐌰𐍂𐌸 𐍃𐍉 𐌱𐌰𐌿𐍂𐌲𐍃𐍅𐌰𐌳𐌳𐌾𐌿𐍃 ·𐌴· 𐌾𐌰𐌷 ·𐌺· 𐌳𐌰𐌲𐌰 𐌼𐌴𐌽𐍉𐌸𐌹𐍃 𐌰𐌻𐌿𐌻𐌹𐍃, ·𐌽· 𐌳𐌰𐌲𐌴 𐌾𐌰𐌷 ·𐌱· 16 𐌾𐌰𐌷 𐍅𐌰𐍂𐌸, 𐍃𐍅𐌴 𐌷𐌰𐌿𐍃𐌹𐌳𐌴𐌳𐌿𐌽 𐍆𐌹𐌰𐌽𐌳𐍃 𐌿𐌽𐍃𐌰𐍂𐌰𐌹 𐌰𐌻𐌻𐌰𐌹, 𐌾𐌰𐌷 𐍉𐌷𐍄𐌴𐌳𐌿𐌽 𐌰𐌻𐌻𐍉𐍃 𐌸𐌹𐌿𐌳𐍉𐍃 𐌸𐍉𐍃 𐌱𐌹𐍃𐌿𐌽𐌾𐌰𐌽𐌴 𐌿𐌽𐍃𐌹𐍃, 𐌾𐌰𐌷 𐌰𐍄𐌳𐍂𐌰𐌿𐍃 𐌰𐌲𐌹𐍃 𐌹𐌽 𐌰𐌿𐌲𐍉𐌽𐌰 𐌹𐌶𐌴 𐌰𐌱𐍂𐌰𐌱𐌰· 𐌾𐌰𐌷 𐌿𐍆𐌺𐌿𐌽𐌸𐌴𐌳𐌿𐌽 𐌸𐌰𐍄𐌴𐌹 𐍆𐍂𐌰𐌼 𐌲𐌿𐌳𐌰 𐌿𐌽𐍃𐌰𐍂𐌰𐌼𐌼𐌰 𐍅𐌰𐍂𐌸 𐌿𐍃𐍆𐌿𐌻𐌻𐌹𐌸 𐌸𐌰𐍄𐌰 𐍅𐌰𐌿𐍂𐍃𐍄𐍅. 17 𐌾𐌰𐌷 𐌹𐌽 𐌳𐌰𐌲𐌰𐌼 𐌾𐌰𐌹𐌽𐌰𐌹𐌼 𐌼𐌰𐌽𐌰𐌲𐌰𐌹 𐍅𐌴𐌹𐍃𐌿𐌽 𐌸𐌹𐌶𐌴 𐍂𐌴𐌹𐌺𐌾𐌰𐌽𐌴 𐌹𐌿𐌳𐌰𐌹𐌴, 𐌸𐌰𐌹𐌴𐌹 𐍃𐌰𐌽𐌳𐌹𐌳𐌴𐌳𐌿𐌽 𐌰𐌹𐍀𐌹𐍃𐍄𐌿𐌻𐌰𐌽𐍃 𐌳𐌿 𐍄𐍉𐌱𐌴𐌹𐌹𐌽, 𐌾𐌰𐌷 𐍄𐍉𐌱𐌴𐌹𐌰𐍃 𐌳𐌿 𐌹𐌼. 18 𐌼𐌰𐌽𐌰𐌲𐌰𐌹 𐌰𐌿𐌺 𐌹𐌽 𐌹𐌿𐌳𐌰𐌹𐌰 𐌿𐍆𐌰𐌹𐌸𐌾𐌰𐌹 𐍅𐌴𐌹𐍃𐌿𐌽 𐌹𐌼𐌼𐌰, 𐌿𐌽𐍄𐌴 𐌼𐌴𐌲𐍃 𐍅𐌰𐍃 𐍃𐌰𐌹𐍇𐌰𐌹𐌽𐌴𐌹𐌹𐌽𐍃, 𐍃𐌿𐌽𐌰𐌿𐍃 𐌰𐌹𐌴𐌹𐍂𐌹𐌽𐍃, 𐌾𐌰𐌷 𐌹𐍉𐌰𐌽𐌰𐌽 𐍃𐌿𐌽𐌿𐍃 𐌹𐍃 𐌽𐌰𐌼 𐌳𐌰𐌿𐌷𐍄𐌰𐍂 𐌼𐌰𐌹𐍃𐌰𐌿𐌻𐌻𐌰𐌼𐌹𐍃, 𐍃𐌿𐌽𐌰𐌿𐍃 𐌱𐌰𐍂𐌰𐌺𐌴𐌹𐌹𐌽𐍃, 𐌳𐌿 𐌵𐌴𐌽𐌰𐌹. 19 𐌾𐌰𐌷 𐍂𐍉𐌳𐌹𐌳𐌴𐌳𐌿𐌽 𐌳𐌿 𐌹𐌼𐌼𐌰 𐍅𐌰𐌹𐌻𐌰 𐌹𐌽 𐌰𐌽𐌳𐍅𐌰𐌹𐍂𐌸𐌾𐌰 𐌼𐌴𐌹𐌽𐌰𐌼𐌼𐌰, 𐌾𐌰𐌷 𐍅𐌰𐌿𐍂𐌳𐌰 𐌼𐌴𐌹𐌽𐌰 𐍃𐍀𐌹𐌻𐌻𐍉𐌳𐌴𐌳𐌿𐌽 𐌹𐌼𐌼𐌰, 𐌾𐌰𐌷 𐌰𐌹𐍀𐌹𐍃𐍄𐌿𐌻𐌰𐌽𐍃 𐌹𐌽𐍃𐌰𐌽𐌳𐌹𐌳𐌰 𐍄𐍉𐌱𐌴𐌹𐌰𐍃 𐍉𐌲𐌾𐌰𐌽 𐌼𐌹𐌺.

𐌰𐍆𐌳𐌰𐌹𐌻 ·𐌶·

[𐌳] 1 𐌾𐌰𐌷 𐍅𐌰𐍂𐌸, 𐍃𐍅𐌴 𐌲𐌰𐍄𐌹𐌼𐍂𐌹𐌳𐌰 𐍅𐌰𐍂𐌸 𐍃𐍉 𐌱𐌰𐌿𐍂𐌲𐍃𐍅𐌰𐌳𐌳𐌾𐌿𐍃, 𐌾𐌰𐌷 𐌲𐌰𐍃𐌰𐍄𐌹𐌳𐌰 𐌷𐌰𐌿𐍂𐌳𐌹𐌽𐍃, 𐌾𐌰𐌷 𐌲𐌰𐍅𐌴𐌹𐍃𐍉𐌳𐌰𐌹 𐍅𐌰𐌿𐍂𐌸𐌿𐌽 𐌳𐌰𐌿𐍂𐌰𐍅𐌰𐍂𐌳𐍉𐍃 𐌾𐌰𐌷 𐌻𐌹𐌿𐌸𐌰𐍂𐌾𐍉𐍃 𐌾𐌰𐌷 𐌻𐌰𐌹𐍅𐍅𐌴𐌹𐍄𐌴𐌹𐍃· 2 𐌾𐌰𐌷 𐌰𐌽𐌰𐌱𐌰𐌿𐌸 𐌰𐌽𐌰𐌹𐌹𐌽 𐌱𐍂𐍉𐌸𐍂 𐌼𐌴𐌹𐌽𐌰𐌼𐌼𐌰 𐌾𐌰𐌷 𐌰𐌽𐌰𐌽𐌴𐌹𐌹𐌽 𐍆𐌰𐌿𐍂𐌰𐌼𐌰𐌸𐌻𐌾𐌰 𐌱𐌰𐌿𐍂𐌲𐍃 𐌹𐌰𐌹𐍂𐌿𐍃𐌰𐌻𐌴𐌼𐍃, 𐌿𐌽𐍄𐌴 𐍃𐌰 𐍅𐌰𐍃 𐍅𐌰𐌹𐍂 𐍃𐌿𐌽𐌾𐌴𐌹𐌽𐍃 𐌾𐌰𐌷 𐍉𐌲𐌰𐌽𐌳𐍃 𐍆𐍂𐌰𐌿𐌾𐌰𐌽 𐌿𐍆𐌰𐍂 𐌼𐌰𐌽𐌰𐌲𐌰𐌽𐍃· 3 𐌾𐌰𐌷 𐌵𐌰𐌸 𐌹𐌼᛬ 𐌽𐌹 𐌿𐍃𐌻𐌿𐌺𐌰𐌹𐌽𐌳𐌰𐌿 𐌳𐌰𐌿𐍂𐍉𐌽𐍃 𐌹𐌰𐌹𐍂𐌿𐍃𐌰𐌻𐌴𐌼𐍃, 𐌿𐌽𐌳 𐌸𐌰𐍄𐌴𐌹 𐌿𐍂𐍂𐌹𐌽𐌽𐌰𐌹 𐍃𐌿𐌽𐌽𐍉 . . . . 13 . . . . 𐌷𐌿𐌽𐌳𐌰 ·𐌼· ·𐌴· — 14 𐍃𐌿𐌽𐌾𐌿𐍃 𐌶𐌰𐍇𐍇𐌰𐌹𐌰𐌿𐍃 ·𐍈· ·𐌾· — 15 𐍃𐌿𐌽𐌹𐍅𐌴 𐌱𐌰𐌽𐌰𐌿𐌹𐍃 ·𐍇· ·𐌾· ·𐌱· — 16 𐍃𐌿𐌽𐌰𐌿𐍃 𐌱𐌰𐌱𐌰𐍅𐌹𐍃 ·𐍇· ·𐌺· ·𐌲· — 17 𐍃𐌿𐌽𐌰𐌿𐍃 <·𐌰𐌶>·𐌲𐌰𐌳𐌹𐍃 ·𐌱· 𐌸𐌿𐍃𐌿𐌽𐌳𐌾𐌿𐍃 ·𐍃· ·𐌺· ·𐌱· — 18 𐍃𐌿𐌽𐌹𐍅𐌴 𐌰𐌳𐍉𐌽𐌴𐌹𐌺𐌰𐌼𐌹𐍃 ·𐍇· ·𐌾· ·𐌵· — 19 𐍃𐌿𐌽𐌹𐍅𐌴 𐌱𐌰𐌹𐌲𐌰𐌿𐍃𐌹𐍃 ·𐌱· 𐌸𐌿𐍃𐌿𐌽𐌳𐌾𐍉𐍃 ·𐌾· ·𐌵· — 20 𐍃𐌿𐌽𐌹𐍅𐌴 𐌰𐌳𐌳𐌴𐌹𐍃 ·𐍇· ·𐌽· ·𐌳· — 21 𐍃𐌿𐌽𐌰𐌿𐍃 𐌰𐌶𐌴𐌹𐍂𐌹𐍃, 𐍃𐌿𐌽𐌰𐌿𐍃 𐌰𐌹𐌶𐌰𐌹𐌺𐌴𐌹𐌹𐌽𐍃, 𐌽𐌹𐌿𐌽𐍄𐌴𐌷𐌿𐌽𐌳 𐌾𐌰𐌷 ·𐌷· — 22 𐍃𐌿𐌽𐌹𐍅𐌴 𐌰𐍃𐍃𐌰𐌿𐌼𐌹𐍃 ·𐍃· ·𐌺· ·𐌲· — 23 𐍃𐌿𐌽𐌹𐍅𐌴 𐌱𐌰𐍃𐍃𐌴𐌹𐍃 ·𐍄· ·𐌻· ·𐌲· — 24 𐍃𐌿𐌽𐌹𐍅𐌴 𐌹𐍉𐍂𐌹𐌰𐌹𐍃 ·𐍂· ·𐌹· ·𐌱· — 25 𐍃𐌿𐌽𐌹𐍅𐌴 𐌲𐌰𐌱𐌰𐍉𐌽𐍃 ·µ· ·𐌴· — 26 𐍃𐌿𐌽𐌹𐍅𐌴 𐌱𐌹𐌸𐌻𐌰𐌹𐌷𐌰𐌹𐌼𐌹𐍃 ·𐍂· ·𐌺· ·𐌲· — 𐍃𐌿𐌽𐌹𐍅𐌴 𐌽𐌰𐌹𐍄𐍉𐍆𐌰𐌸𐌴𐌹𐍃 ·𐍂· ·𐌹· ·𐌵· — 27 𐍃𐌿𐌽𐌹𐍅𐌴 𐌰𐌽𐌰𐌸𐍉𐌸𐌹𐍃 ·𐍂· ·𐌺· ·𐌷· — 28 𐍃𐌿𐌽𐌹𐍅𐌴 𐌰𐍃𐌼𐍉𐌸𐌹𐍃 ·𐍂· ·𐌺· ·𐌷· — 29 𐍅𐌰𐌹𐍂𐌴 𐌺𐌰𐍂𐌴𐌹𐌰𐌸𐌹𐌰𐌰𐍂𐌴𐌹𐌼 𐌾𐌰𐌷 𐌺𐌰𐌹𐍆𐌰𐌹𐍂𐌰 𐌾𐌰𐌷 𐌱𐌴𐍂𐍉𐌸 ·𐍈· ·𐌼· ·𐌲· — 30 𐍅𐌰𐌹𐍂𐍉𐍃 𐍂𐌰𐌼𐌰 𐌾𐌰𐌷 𐌲𐌰𐌱𐌰𐌰 ·𐍇· ·𐌺· ·𐌲· — 31 𐍅𐌰𐌹𐍂𐍉𐍃 𐌼𐌰𐌺𐌼𐌰𐍃 ·𐍂· ·𐌺· ·𐌱· — 32 𐍅𐌰𐌹𐍂𐍉𐍃 𐌱𐌰𐌹𐌸𐌹𐌻𐌹𐍃 𐌾𐌰𐌷 𐌲𐌰𐌹 ·𐍃· ·𐌺· ·𐌲· — 33 𐍅𐌰𐌹𐍂𐍉𐍃 𐌽𐌰𐌱𐌰𐍅𐌹𐍃 ·𐌽· ·𐌱· — 𐍃𐌿𐌽𐌾𐌿𐍃 𐌼𐌰𐌺𐌴𐌹𐌱𐌹𐍃 ·𐍂· ·𐌽· ·𐌵· — 34 𐍃𐌿𐌽𐌾𐌿𐍃 𐌰𐌹𐌻𐌰𐌼𐌹𐍃 𐌰𐌽𐌸𐌰𐍂𐌹𐍃 𐌸𐌿𐍃𐌿𐌽𐌳𐌹 ·𐍃· ·𐌽· ·𐌳· — 35 𐍃𐌿𐌽𐌾𐌿𐍃 𐌴𐌴𐌹𐍂𐌰𐌼𐌹𐍃 ·𐍄· ·𐌺· — 36 𐍃𐌿𐌽𐌾𐌿𐍃 𐌴𐌹𐌰𐌹𐍂𐌴𐌹𐌺𐍉𐌽𐍃 ·𐍄· ·𐌼· ·𐌴· — 37 𐍃𐌿𐌽𐌾𐌿𐍃 𐌻𐍅𐌳𐌳𐍉𐌼𐌰𐌴𐌹𐍃 𐌾𐌰𐌷 𐌰𐌽𐍉𐍃 ·𐍈· ·𐌺· ·𐌴· — 38 𐍃𐌿𐌽𐌾𐌿𐍃 𐌰𐌹𐌽𐌽𐌰𐌹̈𐌽𐍃 ·𐌲· 𐌸𐌿𐍃𐌿𐌽𐌳𐌾𐍉𐍃 ·𐍇· ·𐌻· — 39 𐌾𐌰𐌷 𐌲𐌿𐌳𐌾𐌰𐌽𐍃᛬ 𐍃𐌿𐌽𐌾𐌿𐍃 𐌰𐌹𐌳𐌳𐌿𐌹𐌽𐍃 𐌿𐍃 𐌲𐌰𐍂𐌳𐌰 𐌹𐌴𐍃𐌿𐌹𐍃 𐌽𐌹𐌿𐌽 𐌷𐌿𐌽𐌳𐌰 ·𐌿· ·𐌲· — 40 𐍃𐌿𐌽𐌾𐌿𐍃 𐌰𐌹𐌼𐌼𐌴𐌹𐍂𐌹𐌽𐍃 𐌸𐌿𐍃𐌿𐌽𐌳𐌹 ·𐌽· ·𐌱· — 41 𐍃𐌿𐌽𐌾𐌿𐍃 𐍆𐌰𐌻𐌻𐌰𐍃𐌿𐍂𐌹𐍃 𐌸𐌿𐍃𐌿𐌽𐌳𐌹 ·𐍃· ·𐌼· ·𐌶· — 42 𐍃𐌿𐌽𐌾𐌿𐍃 𐌹𐌰𐍂𐌴𐌹𐌼𐌹𐍃 𐌸𐌿𐍃𐌿𐌽𐌳𐌹 ·𐌹· ·𐌶· — 43 𐌾𐌰𐌷 𐌻𐌰𐌹𐍅𐍅𐌴𐌹𐍄𐌴𐌹𐍃᛬ 𐍃𐌿𐌽𐌾𐌿𐍃 𐌹𐌴𐍃𐌿𐌹𐍃 𐌾𐌰𐌷 𐌺𐌰𐌹𐌳𐌼𐌴𐌹𐌴𐌻𐌹𐍃 𐌿𐍃 𐍃𐌿𐌽𐌿𐌼 𐍉𐌳𐌿𐌴𐌹𐌹𐌽𐍃 ·𐌿· ·𐌳· — 44 𐍃𐌿𐌽𐌾𐌿𐍃 𐌰𐍃𐌰𐌱𐌹𐍃 𐌻𐌹𐌿𐌸𐌰𐍂𐌾𐍉𐍃 ·𐍂· ·𐌼· ·𐌷· — 45 𐍃𐌿𐌽𐌾𐌿𐍃 𐌳𐌰𐌿𐍂𐌰𐍅𐌰𐍂𐌳𐌴᛬ 𐍃𐌿𐌽𐌰𐌿𐍃 𐍃𐌰𐌹𐌻𐌰𐌿𐌼𐌹𐍃 𐌾𐌰𐌷 𐍃𐌿𐌽𐌾𐌿𐍃 𐌰𐌶𐌴 . . . .